SUBLING nanawagan ang medical expert sa GenSan sa padayong pagsunod sa minimum health protocols batok Covid-19. Kini dungan sa pagbutang sa siyudad sa ‘moderate risk’ gikan sa high risk lima ka bulan na ang milabay.
Matud ni Dr. Fidel Peñamante, Presidente sa Philippine Medical Association (PMA) GenSan- chapter. Bisan pa man naa na lang sa 2.2% gikan sa 47% ang narekord nga positivity rate sa dakbayan gikan nakalabay’ng seman angayang dili magkumpyansa ang publiko tungod naa gihapon ang bahad sa Covid-19 ug mga bag-ong variant of concerns.
Ugaling muluag ang seguridad, dako og posibilidad nga subling mapuno ang mga ospital tungod sa mga kaso. Naglaom usab kini nga mosaka ang ihap sa ‘fully vaccinated’ sa GenSan bag-o mahuman ang tuig sama sa gikatakdang target.
Labi na sa pagsugod na og bakuna sa mga minor de edad nga dunay comorbidities. Sa ulahing datus sa LGU naa pa lang sa 27% o 123,612 gikan sa 459,732 target population nga punting bakunahan. ( Richel Gubalani)
