PERSONAL nga gi-adtoan sa Mayor sa Alabel ang mga mananagat sa Ladol nga adunay kabalaka may kalabotan sa ilang ginabutangan og bangka gumikan sa gipatukod nga rescue center sa PAMB ug DENR.
Oktubre 25 adlaw nga Lunes alas otso sa buntag niabot si Mayor Vic Paul Salarda sa lugar unya gipatawag ang mga tawo nga adunay kabalaka sa ilang docking Area.
Sumala sa ilang chairperson nga si Nelanie Sison nga nagareklamo ang iyang mga sakop mao nga iyaha usab nga gipagawas ang mao nga reklamo.
Mao nga gipasabot ni Mayor Salarda nga ang lugar gipanag-iyahan sa gobyerno ug karon adunay proyekto ang gobyerno alang sa proteksyon sa mga wildlife ug gitugotan niini nga maka-estorya ang anaa sa lugar.
Sumala kay Andrea Pajardo ang ilang kabalaka mapahawa sila sa Ladol ug ang kasigurohan sa ilang mga bangka kay mao kini ang ilang panginabuhian sama sa mag-uuma nga adunay karabao.
Sumala usab kay Grace Montecalvo ang gusto sa mga mananagat nga anaa lang sa duol ang ilang mga bangka kay aduna daw nagapangawat sa ilang mga tools sa bangka, kon naa usab sila sa layo bug-at daw kaayo ang makina nga hakwaton gikan sa ilang balay kon kaadlawon aron managat, gidugang niini nga nakalitan daw sila nga sa kalit lang adunay gibutang nga proyekto sa lugar.
Ang tubag ni Salarda iyaha na nga gipatrabaho ang tabok sa sapa aron didto magbutang sa bangka ang mga mananagat, patas-an aron nga dili maabot sa tubig baha o sa tubig dagat.
Nagpasalig ang Mayor nga dili una pahawaon sa Ladol ang mga mananagat ug pagkahuman sa estorya iyang gi-inspection ang lugar, gi tan-aw ang mga bangka, ang bukana nga natabunan sa balas ug ang lugar nga kabalhinan sa walay mabutangan sa mga bangka.
Human niini nipasalig nga mohatag og tunga sakung bugas sa tanang miyembro sa asosasyon sa mga mananagat sa lugar, samtang usa sa iyang naisip nga magduso og ordinansa aron maghimo og wharf sa Ladol kay ang ilang naunang ordinansa nakalatid nga anaa sa Kawas ang docking area. ( Ver Diazon)
