Nakahunong na sa karsel sang Panay Municipal Police Station ang ginakabig nga High Value Individual (HVI) matapos nadakpan sa ginkasa nga drug buy bust operation sang gintingub nga pwersa sang Panay MPS (Lead Unit), Maayon MPS kag Panitan MPS sa Brgy. Bago Chiquito, Panay, Capiz takna alas 4:20 kaina sang kaaganhon, Disyembre 19.
Ginkilala ang nadakpan kay Jeffrey Francisco alyas “Epeng”, yara sa legal nga pang-edaron.
Narekober sa paghinakop kag kontrol ni Francisco ang 17 tanan ka sachets sang ginasuspetsahan shabu lakip na diri ang nabakal sang poseur buyer; P100 nga buy-bust money; P19,500 nga boodle money; Two (2) pcs tooter; isa ka coin purse color red kag isa ka unit sang motorsiklo.
Ginabanta nagabug-at sa 85 gramos ang nakumpiskar nga iligal nga droga kag may standard drug price nga P578,600
Magapangatubang sang kaso nga paglapas sa Republic Act 9165 ukon Comprehensive Dangerous Drugs Act of 2002 si Francisco.
Natalana naman ini nga pagadal-on sa Capiz Provincial Forensic Unit (PFU) lakip na ang mga nakumpiskar nga drug items agud ipaidalom sa drug testing kag forensic examination. | Judy Ann Juare
