Arestado ang tatlo ka mga durugista sa ginkasa nga drug buy-bust operation sa Brgy Tiza, Roxas City takna alas 3:15 kaina sang kaaganhon, Miyerkules, Agosto 16.
Ginkilala ang mga nagkaladakpan nga sanday Shayne Iver So alias “shayne” 22-anyos, resident sang Brgy 7 apang temporary nga nagapuyo sa Brgy Tiza, kag isa ka Regional Priority (Main target); Nelfa Alindajao, 20-anyos, residente sang Brgy Baybay, High Value Individual (HVI); Rolan Malones, 23-anyos, residente sang Brgy 10, Roxas City, High Value Individual (HVI).
Nakuha sa posisyon kag paghinakop sang mga nagkaladakpan ang 7 tanan ka sachets sang suspected shabu lakip na ang nabakal sang police poseur buyer, P6,000 nga buy bust money, 1 pouch, 1-coin purse, P700 nga cash sa nagkalain-lain nga denominasyon, 1 unit cellphone kag mga Drug Paraphernalia.
Ginabanta nagabug-at sang 33 gramos ang nakumpiskar nga iligal nga droga kag nagabalor sang P224,400.
Magapangatubang ang mga ini sang kaso nga paglapas sa RA 9165 ukon Comprehensive Dangerous Drugs Act of 2002.
Sa karon, nagapabilin ang mga suspetsado sa kustodiya sang Roxas City PNP para sa nagakaigo nga disposisyon. | Judy Ann Juare
