GIKUMPIRMA ni Dr. Fidel Peñamante, presidente sa Philippine Medical Association kun PMA GenSan nga mas taas ang kaso sa mga natakdan sa COVID-19 sa ubang kanasuran sama sa Amerika sa mga wala nabakunahan.
Kini ang gibutyag ni Peñamante nga mahinungdanon gayud nga magpabakuna batok COVID-19 labi pa karon nga daghang variant na sa maong virus ang mikatag.
Dugang pa niini sa Amerika, mokabat sa 94 hangtud 97 percent sa mga natakdan sa COVID-19 ang dili bakunado.
Mas ubos matud pa ang tsansa nga matakdan sa virus kung may proteksyon nga bakuna.
Gawas niini, dili usab lalim ang sagubangon nga kalisod sa pasyente, sa iyang pamilya tungod sa kadako sa gastos sa pagpa-ospital labi pa nga wala usay igong kwarta ang kadaghanan.
Alayun niini, sogyot ni Peñamante magbaton na og behavorial change, kung kaniadto nagaingom kada adlaw, kini angayang wagtangon na, ug dugangan na ang pag-ampo aron nga malingkawasan ang kalisdanan nga posibleng atubangon dala sa pandemya.
