Kritikal sa hospital ang isa ka senior citizen nga mangunguma matapos aksidente nga maigo sang bala sang armas luthang sa ulo samtang nagapahuway sa payag sa Barangay Tuburan, Maayon, Capiz.
Ginkilala ang biktima kay Rolly Canonis, 60-anyos samtang suspek amo si Jundy Ballon, 36-anyos lunsay residente sang nasambit nga Barangay.
Sandig sa imbestigasyon sang Maayon Municipal Police Station, ginapahayag nga nagapahuway ang biktima sa payag samtang ang suspek ang nagapaniro naman sang pispis gamit ang 12-gauge shotgun sa diin aksidente sini nga naiguan ang biktima sa ulo.
Bangud sa natabo, madasig nga ginpadangat sa Bailan District Hospital ang biktima apang gintransfer ini sa West Visayas Hospital sa syudad sang Iloilo.
Boluntaryo naman nga nagsungka sa Maayon PNP ang suspek kag nagpahayag nga magabulig ini sa galastusan sa ospital sa pagpabulong sa biktima.
Nahibaluan nga maghimata man ang biktima kag suspek. | Judy Ann Juare
