Apektado ang mga fish cages sa Barangay Barra sa patigayunon nga Desiltation kag Dredging operation ukon pagkutkot sa Panay River sa siyudad sang Roxas.
Pagaumpisahan sang Department of Public Works and Highways ang operation sa sa masunod nga semana sa bukana sang suba nga nahamtang sa kabarangayan sang Barra, Bato kag Banica nga padulong sa Punta Cogon.
Sa interview sang Brigada News FM kay Punong Barangay Ernie “Bobot” Borreros, ginpahayag sini nga nagpadulong sa iya talatapan ang pila ka mga tag-iya sang fish cages kag nagpamangkot kun san-o magasugod ang Dredging project kag kun ano ang bulig nga mahimo mahatag sa ila sang City Government bangud apektado gid ang ila pangabuhian.
Suno kay Borreros, pabor gid sa tanan nga pumuluyo ang nasambit nga proyekto bangud kun sa tion nga mapadalom na ang suba mahagan-hagan na ang pagbaha sa pila ka mga lugar kag magadamo naman liwat ang mga isda nga makuha.
Ginpahayag man sang kapitan, nga pinaagi sa sini nga proyekto maplastar na sang maayo ang mga fish cages kag mabutang sa palareho nga sukat ang structures bangud tuman na kagutok ang suba.
Dugang pa ni Borreros, plano sang City Agricultures office nga sani-sanihon ang mga fish cages agud mangin matawhay sa tion nga may maglabay nga dalagku nga pump boats.
Nagpanugyan man ini sa iya mga pumuluyo nga apektado nga indi magkabalaka bangud indi magpabaya ang gobyerno kag pagasolusyonan gid ang ila problema. | Judy Ann Juare
