Pilas sa kilid ang naangkon sang isa ka mamumugon matapos ginbuno sang iya kaupod sa ilimnan sa Brgy. Bag-ong Barrio, Tapaz, Capiz takna alas 12:02 kaina sang kaaganhon, Mayo 24.
Ginkilala ang biktima kay alyas Mak-mak, 30-anyos, residente sang Brgy. Cansalongon, Isabela, Negros Occidental. Samtang ang ginatudlo suspek amo si alyas Dodoy, 22-anyos, residente naman sang Brgy Manaripay, Lambunao, Iloilo apang lunsay temporaryo nga nagatiner sa Brgy. Bag-ong Barrio.
Sandig sa imbestigasyon sang Tapaz Municipal Police Station, naga-inom inom ang biktima kag suspek sang makahulubog nga ilimnon, ginapahayag nga nagalantaw sang movie ang biktima sa iya cellphone sang hinali nalang ini ginpalapitan kag ginhandos sang suspek gamit ang kutsilyo.
Gindala ang biktima sa Tapaz District Hospital apang sa ulihi gin-transfer sa Roxas Memorial Provincial Hospital para sa dugang nga pagbulong.
Madasig naman nga nagpalagyo ang suspek matapos ang nakumiter nga krimen. Nagaguwa sa imbestigasyon sang kapulisan nga kahulugbon ang motibo sa insidente.
Sa karon, padayon ang hot pursuit operation sang mga katapo sang Tapaz MPS sa suspek. | Judy Ann Juare
