Nagdaog bilang Miss Aklan Ambassadress 2022 ru sangka 20 anyos nga Malinaonon beauty tubong Brgy. Manhanip, Malinao, Aklan.
Sa interview it BRIGADA News FM-Kalibo kay Ms. Whelryn Inostro Yabut, uwa it ibang nag kombensi kana nga mag-intra sa beauty pageant kundi ru mga nakapalibot kana nga may positibong panan-awan ag pag pati.
Naga pati si Yabut nga ru kada individual hay may sariling talent nga gin tao it Diyos.
Dugang pa ni Yabut, confident imaw sa anang sarili sa pagsabat sa mga kutana nga nag tao kana it focus halin sa mga board of judges nga ingkasong imaw hay maging Miss Aklan Ambassadress 2022, maga bulig imaw sa mga naga kinahangean kapares sa pag pati ni Mother Theresa nga “kun ano ru pweding ubrahon makaron hay ubrahon eagi dahil indi eon maibalik ru oras nga nakataliwan eon”.
Dugang pa ni Miss Aklan Ambassadress 2022, tanan kita hay gin tuga it Diyos nga pare-pareho it kagwapahan, kabaskog apang naka depende eamang sa atong pagbaton ag pag tao it importansya sa atong mga sarili ag eabaw sa tanan hay kaugali-an o attitude it sangka individual.
Gin pasaeamatan man ni Yabut ru tanan nga mga Malinaons nga nag suporta kana ku nagtaliwan nga beauty pageant.
Si Ms. Whelryn Inostro Yabut hay nagtapos sa Malinao School for Philippine Craftsmen it anang High School ag presenting second year college Bachelor of Secondary Education major in English sa Aklan State University-Banga Campus.//MARIVIC Y. ILIN
