Dead on arrival ang usa ka mag-uuma human nga napusilan sa miresponding pulis sa usa ka reklamo nga ilang nadawat nga sumala pa kasamok nga hatod sa nasangpit nga lalaki sa Linawan Elementary School, Barangay Linawan, Bansalan, Davao del Sur kagahapon sa udto, Hunyo 27, 2023.
Una niini, nanawag og police assistance ang mga magtutudlo sa nasangpit nga eskwelahan human nga nahadlok sa suspek nga nailang si Nelson Orbeta Guiao, 49 anyos, minyo, ug residente sa Purok 3, Barangay Linawan, Bansalan.
Paspas hinoon nga miresponde ang kapulisan ug ilang nasakpan ang suspek sa panimalay niini, sa dihang nagpaila silang sakop sa kapulisan, midasmag hinoon kini kanila dala ang lagaraw ug karit hinungdan nga gipusil sa paa ang maong suspek.
Nakahimo pa sa paghikot sa samad pinusilan ang suspek sulod sa iyang balay, ug inay nga musurender gigukod pa niini ang personahe sa kapulisan bitbit gihapon ang lagaraw ug karit.
Apan malampuson pa gihapon kini nga nababagan sa responding Police personnel kauban si Barangay Kagawad Gamaliel R. Posas ug gidala ang suspek sa MABAMA hospital alang sa medikasyon apan gideklara kining dead on arrival sa doctor.
Samtang, gidala sab sa ospital ang pulis human nga nakaangkon og injurie human napandol atol sa pagresponde.
Kasamtangan, anaa na Brillantes Funeral Home, Bansalan, Davao del Sur ang patay’ng lawas sa suspek ug nagpaabot na sa post mortem examination o ang hinungdan sa kamatayon niini.
