Gikonsidera karon nga personal grudge ang posibleng motibo sa pagpusil-patay sa usa ka lalaki nga taga Agusan del Sur sa dalangArellano Brgy.9-A, ning dakbayan sa Davao alas-4:05 sa milabay’ng Hunyo 26, tuig kasamtangan.
Kini ang pahayag ni Police Major Marvin Hugos, ang station commander sa San Pedro Police Station atol sa pakighinabi sa Brigada News team.
Dugang pa ni Major Hugos nga nagpadayon pa gihapon karon ang ilang gihimong imbestigasyon kalabotan sa panghitabo, labi pa nga pabilin pang gawasnon ang suspek.
Kahinumdoman nga igo lamang nagbaktas sa nasangpit nga dalan ang biktima nga nailang si Jay Besin Jagunos, 37 anyos, minyo ug residente sa Talisay, Mintal Relocation, ug lumad nga taga- Trento, Agusan Del Sur.
Gisulayan pa sa pagdala sa Southern Philippines medical center ang biktima nga nakaangkon og samad pinusilan sa iyang ulo, apan wala na kini natabang og gideklarang patay sa mga doctor.
Nakuha sa crime scene ang duha ka fired cartridge cases sa caliber .45 pistol.
Samtang, padayon pa ang manhunt operation sa suspek nga base sa mga nakasaksi sa panghitabo nagsuot kini og black jacket ug denim long pants, medium built ang lawas ug 5’7 ang gitas-on nga paspas misibat sa lugar padulong sa V. Mapa Street, ning syudad sa Davao.
