Detenado sa Manolo Fortich Police Station ang mag-live in partner human naharang sa gipahigayong checkpoint sa Brgy. Tankulan, Manolo Fortich, Bukidnon tungod sa kasong pagpangarnap.
Giila ang mga dinakpan nga sila Aldrin Sario, 23-anyos, residente sa P-3 Brgy. Mabuhay, Baungon, Bukidnon ug live-in partner niini nga si Lyca Abdullah, 27-anyos, residente sa Macanhan Brgy. Carmen ning siyudad sa Cagayan de Oro.
Base sa report, naharang sa gipahigayong checkpoint sa kapolisan sa Manolo Fortich inubanan sa highway patrol group kini human makadawat ug report nga adunay gikarnap nga motorsiklo sa Brgy Maluko, Manolo Fortich Bukidnon.
Unang na flag-down sa mga otoridad ang mag-live in nga sakay sa XRM samtang dali usab nga mi-u-turn ang lain pang motorsiklo ug daling nakasibat.
Na-verify sa kapolisan nga kinarnap ang gigamit sa mag-live in tungod sa unang nareport niadtong Enero 3, 2022 sa Lumbia Police Station ning siyudad nga adunay motorsiklo nga gikawat, gawas pa wala kini gipakita nga dokumento.
Narekober gikan sa mga dinakpan ang 1 ka unit sa Honda XRM 125, color black and white ang combination nga nagdala sa plaka 8958 KC.
Samtang padayun pang gipangita sa mga otoridad ang suspek nga si Rommel Atubang, residente sa Brgy. Basak Talakag ,Bukidnon kinsa sakay sa kinarnap nga RUSI KRY 150 Color Green.
Gikustodiya na sa nasampit nga buhatan ang mga dinakpan ingon man ang motorsiklo nga narekober. END
