DAKPAN ang mag-amahan ug laing duha ka indibidwal atol sa gilusad nga drug buy bust operation sa mga personahe sa Davao Oriental Provincial Office of the Philippine Drug Enforcement Agency Regional Office XI kauban ang Lupon Municipal Police Station pasado alas-9 sa gabii sa Panuncialman Street, Barangay Poblacion, Lupon, Davao Oriental. Atol sab sa maong operasyon nadiskobrehan ang drug den.
Napalitan sa gituohang shabu sa PDEA agent nga maoy nagsilbing poseur buyer ang suspek nga si Vourgini Setrina alyas Borge, 29, minyo, drug den maintainer.
Kalakip sab nga nadakpan ang amahan sa suspek nga kauban niini sa operasyon nga mao si Ronald Allan Setrina. Dakpan sab ang drug den visitors nga sila Casimero Urgel ug Reymundo Torrente nga nag shabu session.
Nakuha sa posisyon sa mga dinakpan ang 18 ka pakete sa gituohang shabu nga mutimbang sa kapin kon kulang 15 gramos nga gibana-banaang mukantidad og Php 102,000, duha ka gagmay’ng pakete sa gidudahang dahon sa marijuana, assorted drug paraphernalia ug ang buy-bust marked money.
Kasong kalapsan sa Republic Act 9165 kon Comprehensive Dangerous Drugs Act of 2002 ang gipasaka batok sa mga dinakpan.
