Ro patakaran nga, “no exam, no license renewal” hay uwa pa ginapatuman pero may sambilog pa nga exam nga dapat maipasa it mga motorista agud makabuoe it mas ginpalawig nga validity it driver’s license, raya hay ro “physically fit” sa pagmaneho.
Base kay Atty. Allan Sacramento, acting chief it operations division it Land Transportation Office (LTO) Region 6; dapat magpa-idaeom sa periodic medical exam (PME) ro mga driver’s license holder.
Dugang pa nana, ro PME hay igapatuman eamang sa oras nga ro sambilog ka driver hay maging kuwalipikado para sa lima o napueo ka dag-on nga pagpalawig it anang driver’s license.
Pero bago raya, kinahangean anay nana nga mapasa ro comprehensive driver’s education (CDE).
Ro pagbuoe it PME, base kay Sacramento hay sa idaeom it Republic Act 10930.
Sa Rehiyon 6, ginaasahan nga mag-umpisa sa ulihi nga dominggo it Nobyembre o una nga dominggo it Disyembre ro pag-isyu it lima o 10 ka dag-on nga validity it lisensya./JIL B. LACSON
