NAKIG-ALAYON na ang Land Transportation and Franchising Regulatory Board (LTFRB) sa Land Bank of the Philippines sa rehiyon-12 alang sa pag-release sa fuel subsidy sa 3,300 operator sa Public Utility Vehicle (PUV) dungan sa pagsaka sa presyo sa produktong petrolyo.
Matud ni Renato Paterno Padua, regional director sa LTFRB-12 tumong sa pakig-alayon sa bangko ang dali nga pagpatuman sa Pantawid Pasada Program (PPP).
Ilawom sa maong programa sa gobyerno ang mahatagan og P6,500 ang mga transport sector nga apektado sa fuel hike.
Samtang, butyag ni Padua nagpadayon ang pagpanghatag sa P7,200 sa mga kooperatiba sa transportasyon ilawom sa General Appropriations Act (GAA) ang paghatag niini ang pinaagi sa cash card.
Sa bahin ni Orly Sabelita, labaw sa Metro GenSan Transport Cooperative naa pa lang sa 80 cash card gikan sa 135 ang nasudlan gikan sa budget alang sa subsidiya kanila atong 2021.
Ang mga nasangpit ang una nang gihatagan og subsidiya sulod sa lima katuig ilawom sa Train law. I Richel Gubalani
