ANG pagpugong sa pagtaas sa kaso sa teenage pregnancy sa Alabel, Sarangani Province ang usa mga nganong giduso ang Anti Early Forced and Child Marriage Ordinance.
Kini segun sa pagbutyag ni Alabel Vice Mayor Ronel Español nga naaprobahan sa Sangguniang Bayan ang maong ordinansa niadtong Agosto 25 nga giduso nilang municipal councilors Grafilo ug Galzote.
Dugang ni Español adunay gibasehan nga mga balaod sa pagduso sa ordinansa ug gibalanse usab ang katuyoan ngadto na sa kustumbre ug tradisyon sa mga Lumad sa Alabel.
Gani giangkon usab nga suportado sa nagkadaiyang sektor apil mga IP ang maong ordinansa nga pirmado na ni Mayor Vic Paul Salarda niadtong Biyernes.
Gilauman ni Español nga pinaagi sa maong ordinansa mahimong dili mabutang sa alanganin usab ang kaugmaon sa mga bata, tungod sa pugos nga pagminyo.
Ang musupak sa ordinansa adunay silot nga multa ug pagkabilanggo.
