LEGAZPI CITY – Andam na an Legazpi City Tourism Office para sa papaabot na Semana Santa.
Sa intrevista kan Brigada News FM Legazpi kay City Tourism Officer Cristina Agapita Pacres, sinabi kaini na kaibahan sa saindang pigpreparar an pagbubugtak nin Tourists Information Desks sa mga identified places sa syudad, kun sain an saindang mga staffs an presente puon Huwebes Santo hasta Sabado de Gloria nganing magtaong asistensya bako sana sa mga turista kundi pati naman sa mga lokal na residente.
Segun pa saiya, antes man an Semana Santa, magkakaigwa man sinda nin coordination meeting kaibahan an mga representantes hale sa mga accommodation establishments, tourism-related establishments, attractions asin transport sectors nganing pag-orolayan an mga aktibidad sa mga masunod na aldaw ngunyan na bulan asin nganing matawan nin maray na serbisyo an mga mabirisita.
Naglalaom si Pacres, rurusuon ki mga tawo an manlain-lain na mga tourist attractions asin destinations sa syudad nin huli sa halabang bakasyon na ini.
Nagtao man ki patanid si Pacres para sa mga nagmamawot na mag-ATV, dai sana magpasiring harani o sa mismong laog kan six kilometers permanent danger zone kan Bulkang Mayon.
