Gibasul ang internal conflict o ang wala pagsabtanay sa mga lider sa Sub-Regional Committee in Southern Mindanao sa kamatayon sa usa nila ka lider karong tuiga.
Mao kini ang gipabuhagay ni Ariane Jane Ocheta alias Ka Marikit, ang kanhi Top New People’s Army (NPA) commander ug Guerilla Front 55 Secretary nga bag -ohay lang nibalik sa sabakan sa balaod.
Human gibutyag sa bag- ong mga rebel returnees nga sila si alyas Piyot ug alyas Emil nga maoy naglubong sa patay’ng lawas ni Daniel Bandalan alyas Ka Regoy, daling gibisita ang gilubngan ug gikalot sa tropa sa 1003rd Infantry Brigade kauban ang 3rd Infantry Battalion ang lawas niini didto sa Sta. Felomina, Quezon, Bukidnon niadtong December 6, 2021.
Si Ka Regoy maoy kanhi Commanding Officer sa Guerilla Front 55 ubos sa Sub-Regional Committee 5, Southern Mindanao Regional Committee sa Communist Terrorist Group New People’s Army.
Duha ka bag- ong gi-deploy nga Black Hawk helicopters maoy gigamit nga gisakyan sa mga miembro sa SOCO, mga kabanay niini ug mga miembro sa media nga anaa sa lugar.
Base sa testimonya sa mga kanhi rebelde, namatay si Ka Regoy sa sakit nga tuberculosis
samtang natulog kini sa iyang duyan, upat ka bulan na ang nakalabay.
Sumala pa, gilubong kini sa gilawmon nga tagatuhod lamang.
Gumikan matud pa sa ilang pagtagotago sa bukirong bahin sa Bukidnon, wala naatiman ang sakit nga tuberculosis ni Ka Regoy hangtod namatay kini nga wala nasayri sa iyang pamilya.
Sa laing bahin, gisiguro sa mga miembro nga ang pagka arogante sa mga lider sa CPP-NPA-NDF ug ang internal conflict maoy gikamatyan ni Ka Regoy sulod sa iyang unit tungod sa mga personal nga suliran sa mga lider nga pakyas na sa paggunit sa ilang mga kaubanan ug sa masa.
Gipasalamatan ang mga kanhi rebelde nga nitabang aron ma-retrieve ang patay’ng lawas ni Ka Regoy ug mahatagan ug desenteng lubong sa iyang pamilya.
Sumala sa 10th ID, ang kamatayon ni Ka Regoy diha sa mga kamot sa iyang mga kaubanan usa ka repleksyon unsa kahakog ang mga komyunistang terorista bugti sa ilang kaugalingong interest. BNFM-Davao
