Patay na sang masapwan ang isa ka lalaki matapos nag-inom sang makahulubog nga ilimnon sa Brgy. Libon, Panay, Capiz takna alas 9:20 sang gab-i sang tinalikdan nga Hunyo 23.
Ginkilala ang napatay kay Richard Baselonia, 47-anyos kag residente sang Brgy. Cabugao Oeste sa amo man nga banwa.
Sandig sa imbestigasyon sang Panay Municipal Police Station, nag-inom sang makahulubog nga ilimnon ang biktima kaupod ang lima sini ka mga kaupdanan, takna alas 7:50 sang gab-i, ginapahayag nga nagtulog ang biktima sa bangko. Pag-abot sang alas 9:20, ginpukaw ini ni Jeppe Bolido, isa sa mga kaupod sa pag-inom apang wala na nakabugtaw ang biktima.
Gindala pa ini sa Roxas Memorial Provincial Hospital kag gindeklarar sang doktor nga dead on arrival.
Sa karon, padayon pa ang imbestigasyon sang mga kapulisan sa posible gintunaan sang kamatayon sang biktima. | Judy Ann Juare
