Wala na sang kabuhi sang mag-abot sa Dao District Hospital ang lalaki nga ginluthang sang wala makilala nga suspetsado sa Poblacion Ilaya, Dumarao Capiz.
Ginkilala ang biktima kay Johnny Habulin, 46-anyos, kag residente sang nasambit nga lugar
Sandig sa Dumarao Municipal Police Station, nagpanaog ang biktima sa iya salakyan sang hinali nalang ginpaarakan sang luthang sang wala makilala nga suspek.
Nag-angkon sang madamo nga pilas sa lawas ang biktima nga amo ang gintunaan sang iya kamatayon.
Sa karon, padayon pa ang hot pursuit operation sang kapulisan sa suspek nga ginapahayag nagpalagyo padulong sa banwa sang Cuartero. | Judy Ann Juare