PATAY diha diha dayon ang usa ka amahan human nga nabanggaan og ambulansya pasado alas-6:00 karong gabii, atbang sa Jolibee Ulas ning syudad.
Sa pakighinabi kang Ginang Arlene, ig-agaw sa biktima nga nailang si Renante Cejas, minyo, 48, packer sa lonbisco, nga taga-Astorga Sta. Cruz, Davao del Sur ug temporaryong nagsaka sa Prk. 17, San Roque Bangkal, ning syudad.
Nasayran nga gikan sa trabaho ang biktima sa Lonbisco, Ulas ning syudad ug patabok na unta sa kalsada, apan kalit na lamang kining nabanggaan sa ambulansya nga gimaneho sa usa ka Agapito Arcala Nillas Jr, 47, nga taga- Dalawinon, Magsaysay Davao Del Sur nga naggikan sa Puan ug padulong sa Matina.
Sumala pa nga walay karga nga pasyente ang maong ambulance nga dunay nakatatak nga Magsaysay, Davao del Sur LGU.
Gidala sa lokal nga punerarya ang patay’ng lawas sa biktima.
Samtang padayon ang gihimong imbestigasyon sa kapulisan kalabotan sa nahitabong bangga.
