Padayon karon ang gihimong imbestigasyon sa mga personahe sa Tagum Police Station kalabotan sa nakaplagang patay nga lalaki ala-1:15 sa kadlawon daplin sa bypass road sa Purok 7, Villa Consuelo, Brgy. Apokon, Tagum City sa milabay’ng adlaw.
Sa inisyal nga imbestigasyon sa Tagum PNP, ang maong lalaki nailhan lamang sa alyas nga ‘Strong’, naka- blue maong nga pantalon, sky-blue T-shirt ug anaa sa 5’3ft ang gitas-on nga taga- Brgy. Dumlan, Maco, Davao De Oro.
Saysay sa usa ka security guard sa plantasyon sa saging sa nasangpit nga lugar, samtang nag-roving siya sa area, iya na lamang namatikdan ang maong lalaki nga nagbuy-od na sa kalsada tapad sa iyang motorsiklo og nagkadugo.
Narekober sa scrime scene sa mga sakop sa Davao Norte Provincial Forensic Unit (DNPFU) ang upat (4) ka mga basiyo sa bala nga gituohang kalibre .45 ug kwarta nga mokabat sa 185 pesos.
Unang gituohan sa kapulisan nga personal grudge ang motibo sa krimen gumikan sa naangkon niining mga samad pinusilan sa nagkadaiyang lawas, apan padayon ang ilang imbestigasyon sa ubang anggulo sa pagpusil-patay sa biktima.
