Gumikan sa pagsupak sa kaipong babaye nga sustentohan sa suspek ang iyang anak sa kanhi niining kaminyoon, napusilan hinoon kini, kagabii, Mayo 15 sa Purok Mahogany, Brgy Mahayahay, Digos City.
Ang biktima nailang si alyas “Con”, 57 anyos, housewife, ug ang suspek nga iya rang kaipon nailang si alyas Ed, 53 anyos, tricycle driver, ug nanimuyo sa nasangpit nga lugar.
Sa inisyal nga imbestigasyon sa otoridad, nisupak ang biktima nga sustentohan sa suspek ang iyang anak sa kanhi niini nga asawa, nga maoy hinungdan sa ilang panaglalis nga miresulta sa pagpamusil diin naigo sa walang bukton ang biktima.
Dali hinoon kining gidala sa pinakaduol nga ospital samtang ang suspek nisurender sa kapulisan human sa gilusad nga hot pursuit operation.
Narekober sa crime scene ang usa ka unit sa homemade revolver nga maoy gigamit sa suspek.