LEGAZPI CITY – Sarong 60 anyos na lalaki an binadil-gadan kan duwang dai nabistong mga suspetsado sa Purok 6, Brgy. Buang, syudad kan Tabaco sa probinsya kan Albay, alas 8:30 nin aga kasuodma.
Binisto an biktimang si Eleo Canillo Lorico, may agom, paraoma asin residente kan kaparehong barangay. Basado sa report, tulos na nagresponder an mga personahe kan Tabaco CPS makalihis na maresibe an impormasyon mapadapit sa insidente nin pambabadil sa nasambit na lugar.
Nagluluwas sa inisyal na imbestigasyon kan mga otoridad na kaulay kan biktima an apat sa saiyang mga barkada sa tulay mantang an mga suspetsado nasa gilid sana kan tinampo.
Bigla sanang ruminani an saro sa mga suspetsado dangan kinua an dai maaramang kalibre nin pistol asin pinutok sa biktima.
Makalihis kaini, tulos na duminulag an mga suspek sa dai maaramang direksyon.
Mientras, pigdeklarar man kan nagresponder na personahes kan CDRRMO na dai na nin senyales ki buhay an biktima, asin idinara an lawas kaini sa punerarya para sa post-mortem examination.
