NAKAPASAKA na og kaso ang Lagao PNP batok sa lalaking gitudlong namusil angol sa usa ka membro sa Civil Security Unit nga na-assign sa Dr. Jorge P.Royeca Hospital kaniadtong Agusto 26 sa buntag.
Sa kumpermasyon ni PM Major Yol Hilado anaa na sa ilang kustodiya ang gikonsidera nila nga suspek ug ilaha na nga napasakaan og kaso.
Subay sa talaan sa presento tres ang gikasuhan mao si Juro Busong Ghol samtang kasong frustrated murder ang gipasaka sa pulis Agusto 31 sa udto ug na-subscribe ni Prosecutor Hygeia Macaldo ug may docket number 21H-00877.
Gikumperma usab ni CSU deputy chief Rudy Buot nga nagpabilin sa tambalan ang ilang sakop nga si Dionito Galagaran ug ilang gikalipay ang pagpasaka na og kaso sa Lagao PNP.
Kahibaluan nga nahitabo ang kremin sa gawas sa accounting section sa Dr. Jorge P. Royeca Hospital sa dihang giilog matud pa ni Ghol ang armas ni Galagaran ug dinhi nahitabo ang komosyon nga nisangko sa pagpamusil.
Nakatabang usab ang sundalo nga magpa-swabtest nga si Cpl John Carlo Ukab ug napugngan ang ginahimo sa gitudlong responsabli sa kremin, samtang na-submit na sa Lagao PNP ngadto sa crimelab ang nakuha nga mga basiyo sa bala alang sa ballistic examination. ( Ver Diazon)
