DAKO ang pagduda ni Dr. Fidel Peñamante, presidente sa Philippine Medical Association o PMA-GenSan nga nakasulod na sa GenSan ang Delta variant.
Kini tungod sa kasamtangang occupancy rate sa mga tambalanan ug sa padayung pataas sa kaso sa COVID-19 sa GenSan.
Sa obserbasyon niini nga susama matud pa kini ang prevailing situation sa ubang lugar nga taas ang kaso sa COVID-19 ug may mga kaso usab sa Delta variant.
Sa gipahigayong meeting kauban ang PMA national chapter, daghang mga kasinatian sa nagkadaiyang lugar sa nasud ang gipresenta ug didto may gihimong comparison sa mga areas nga may kaso sa Delta variants.
Sa GenSan sa pagkakaron, gibutyag ni Peñamante nga adunay 25 percent positivity rate o 25 ka nagpositibo gikan sa 100 ka tawo.
Ang GenSan isip usa ka open city, isip economic ug financial hub sa region-12 dako ang puruhan nga may kaso na usab sa Delta variant tungod sa daghang nagasulod og wala nay border lockdown.
Sa karon, bugtong ginahulat ang report sa Philippine Genome Center, aron masayran ang kumpirmasyon kung adunay Delta variant o wala sa GenSan, asa kapin bulan usab ang hulaton tungod sa daghang samples nga ginasuta.
