LEGAZPI CITY – Nakapag-akomplisar ki nasa 937 proyekto na request kan mga barangay an Department Interior and Local Government Bicol puon kan 2022 hasta sa presenteng taon.
Ini an kinumpirmar ni DILG Bicol Regional Director Atty. Arnaldo Escober, Jr., kun sain sinabi niya na an akomplisimentong ini, nasa irarom kan Support to Barangay Development Program asin maabot sa P3.4B an pig-alokar na pondo digdi na nakapagbenepisyo sa 762 manlain-laing barangay sa bilog na rehiyon.
Nagkapira sa mga proyektong ini an mga eskwelahan, barangay health station, water and sanitation system asin farm-to-market roads na kadalasang pighahagad na pasilidad asin istruktura huli ta ini an pinakakinakaipuhan kan mga barangay.
Mientrastanto, tinawan-duon ni Escober na an lakdang na ini, sa pakikipagkoordinar sa iba pang ahensya, komo pagsuporta asin pagtabang sa mga komunidad nganing padagos an magin pag-uswag sa paagi kan pagtatao kan mga kulang, pigmamawot asin prayoridad nindang proyekto.
