LEGAZPI CITY – Preparado na an Bacacay Community College (BComC)sa pag-ako nin mga estudyante ngunyan na school year 2024-2025 en kaso tugutan na kan Commission on Higher Education (CHED) Bicol.
Segun kay Councilor Emmanuel Alparce, Committee Chairman on Education, labi 200 na estudyante an posibleng akuon sa BComC.
Duwang kurso sana su boot an saindang bubuksan, kun sain kaibahan an Bachelor of Science in Business Entrepreneurship asin Bachelor of Science in Early Childhood Education.
Sa lambang kurso, nasa120 mga estudyante an iaakomodar sa nasambit na kolehiyo.
Pigklaro ni Alparce, wara nin babayadan an mga estudyante sa pagklase nin huli ta sakop ini kan free education na pigpondohan kan lokal na gobyerno.
Obheto kaini na tabangan an mga magurang sa pagpaklase kan saindang aki nin libre orog na itong mga warang kakayanan.
