Gipakusgan pa sa Eastern Mindanao Command (EastMinCom) ang pwersa sa frontline units niini sa pagpahigayon og military combat operations, cargo lift, VIP transport, humanitarian assistance, ug disaster response atol sa mga kalamidad pinaagi sa upat ka bag-ong air assets.
Duha sa Black Hawk Choppers ang anaa sa Tactical Operations Wing Eastern Mindanao (TOW-EM), Davao Air Station, Barangay Sasa, Davao City samtang ang laing duha atua sa Tactical Operations Group 10 Headquarters, Lumbia Airport, Cagayan de Oro, City human gidawat ni BGen. Maurito L. Licudine, ang Deputy Commander of EastMinCom, ug LtCol. Omar FridzKhan S. Alpa, Officer-in-Charge sa TOW-EM/Group Commander of Tactical Operations Group 11 sa milabayng Huwebes.
Ang S-70i Black Hawk helicopter mao ang latest sa Black Hawk multi-mission aircraft nga ginama sa Poland-based Sikorsky Aircraft subsidiary PZL Mielec.
Sumala kang EastMinCom Commander LtGen. Greg T. Almerol, pinaagi sa maong mga abyon mas mapakusgan pa ang paglutos sa Communist Terrorist Groups alayon sa tinguha nga maundang na ang armadong pakigbisog pag-abot sa tuig 2022.
Ang pag-abot sa mga air assets pila ka adlaw human napatay sa operasyon ang gibantugang lider sa Komunistang grupo sa Mindanao nga si George Madlos Alyas Ka Oris sa Impasug-ong Bukidnon.
Mapasalamaton usab ang labaw sa EastMinCom sa Commander-in-Chief ug Presidente Rodrigo Roa Duterte sa padayong pagpalambo sa kapasidad sa militar aron maprotektahan ang interes sa nasud ug katawhang Pilipino.BNFM-DAVAO
