Andy Galve
KABANKALAN CITY, Negros Occidental — “Kun may mga harassment gid man, mag tawag gilayon sa kapulisan,” ini ang nangin pahayag ni Cauayan chief of police Lieutenant Colonel Lowell Garinganao.
Sa interview sang Brigada News FM Kabankalan sa opisyal, iya man ginklaro nga wala pa sila may nabaton nga report bisan kay sin-o nga indibidwal nga gin-harass sa ila pag-file sang ila certificate of candidacy (COC).
Suno pa kay Garinganao, handa maghatag sang police assistance kun kinahanglanon ang ila bulig, kag mahimo lang magtawag sa ila mga hotline numbers ukon magpadulong sa ila opisina agud mag report.
Ini nga pahayag sang opisyal ang nagguwa isa ka oras matapos nag-post si Jurry Nabaja sa iya Facebook page, nga gina-alegar may mga makaduloda nga mga persona ang nagalibot sa iya foundation kag sa mga lugar kun diin magkadto ang iya political team.
Si Nabaja ang magapapili sa pagka-alkalde sa Cauayan nga ang iya mangin kasumpong amo si incumbent mayor John Rey Tabujara.
Nagpasalig man ang kapulisan nga kun may mabaton sila nga report sang intimidasyon ukon pagpamahog gikan sa mga political aspirants, gilayon sila nga magahimo sang imbestigasyon. -BNFM Kabankalan
