Nailista it Police Regional Office (PRO-6) ro pagnaba it krimen sa 4.06 percent o 441 nga insidente ro nairekord ku first semester makarung dag-on kumpara sa magkaparehung period it 2021.
Halin ku Enero hasta Hunyo it dag-on 2021, ro PRO-6 hay naglista it 10, 849 total crime incidents pero makarung 2022 hay naglista eon lang it 10, 408.
Ro mga nailistang insidente it tanan nga probinsya ag syudad sa idaeum it kategorya ngara hay nagnaba, owa’t eabot sa probinsya it Antique nga may minimal nga pagtaas it 11 insidente.
Sa mga syudad ag probinsiya nga nagnaba ro insidente sa idaeum it peace and order indicator, nanguna ro Iloilo City nga may mabahoe nga pagnaba it 42.22 percent o 597 incidents.
Gindayaw it PRO-6 top cop nga si Police Brigadier General Flynn E Dongbo ro pagtinguha it tanan nga unit commander ag tanan nga tawuhan kara sa rehiyon para sa gin-iliba nga kontribusyon nga nagresulta sa pagnaba it mga insidente it krimen sa rehiyon. / ANN DESLENE SALAZAR
