Padayun ro imbestigasyun nga ginaubra makarun it Nabas PNP kamana man ro pag-usoy sa suspek nga nagsueod sa sangka baeay sa Brgy. Nagustan sa banwa it Nabas, Aklan kabii.
Sa video nga ginpost it Nabas PNP, sangka eaeaki ro nakita sa cctv footage it nasambit nga baeay nga nagapanaog it hagdan.
Owa raya it suksok nga eambong pang ibabaw ag naka jersey shorts eamang.
Sa report, samtang nagapahuway ro tag-ana it baeay hay nakita kara sa anang monitor nga may tawo sa sueod it anang baeay rasun nga ginbuoe kara ro anang license firearm nga 9mm ag nagpanaog.
Kat mapanuhan it suspek nga matsa may nagapanaog hay nagpanago raya, makita man sa video nga nagpaeupok it baril ro babaye nga tag-ana ag dikara eon sanda nag aeagawan it baril it suspek.
Makita pa sa video nga nanaog ro unga nga babaye it tag-ana, ag ginsampok pa kara ro suspek nga nakikipag-aeagawan it baril sa anang ina.
Sa interview it Brigada News FM Kalibo sa Nabas PNP, nadaea it suspek ro nasambit nga baril ag insigida raya nga nagpaeagyo.
Ginatan-aw nga motibo it suspek sa pagsueod sa nasambit nga baeay hay pagpanakaw.
Samtang, may reward nga igatao sa sin-uman nga makaturo ag makakilaea sa nasambit nga suspek. / ANN DESLENE SALAZAR
