NAGPAABOT og pahisubo ang konseho sa General Santos City sa pamilya Lagare gumikan sa pagpanaw sa amahan sa pamilya nga si kanhi OIC City Mayor Atty. Dominador Lagare Sr., Hulyo 12 sa kasamtangan nga tuig.
Sa kumpermasyon ni Sangguniang Panlungsod Secretary Atty. Rosendo Roque hiniusa nga giduso sa konseho ang resolusyon sa pagpaabot pahisubo ngadto sa pamilya Lagare, dinalian ang pagduso sa resolusyon mao nga wala pay saktong draft nga napirmahan.
Sumala kay Roque nga nasayod na sila nga aduna nay gipamati sa lawas ang kanhi usab konsehal sa syudad, gani ilaha pa nga na-imbitahan sa bag-ong legislative building unya gihatagan og pasidungog kaniadtong Marso 2020.
Sa pagkaila ni Roque kay Lagare usa gayod kini ka tinuod nga fighter sa konseho ug moapil gayod sa hisgutanan kon may kalabotan sa tawhanong katungod.
Tungod sa kasub-anan mao nga nagduso ang konseho og resolusyon, samtang gumikan sa quarantine status sa syudad nga ilawom sa General Community Quarantine status kun GCQ malimitahan ang pag-adto sa haya sa kanhi konsehal ug kanhi OIC Mayor. ( Ever Diazon)
