LEGAZPI CITY – Inihalal na si Albay 1st District Rep. Edcel Lagman bilang bagong pangulo ng Liberal Party sa isinagawang national executive council meeting ng partido.
Ayon kay Congressman Lagman, nangako itong pamumunuan niya ang LP nang may ‘principled activism’.
Aniya, itutuloy din ng partido ang legasiya nito ng democratic liberalism, pagrespeto sa rule of law, pag-protekta sa karapatang pantao, good governance and accountability, kampanya laban sa authoritarianism at tunay na people empowerment.
Maliban pa rito, nahalal din bilang bagong opisyal ng LP sina former Rep. Kit Belmonte bilang Vice Chairman, former Rep. Erin Tañada bilang Executive Vice President, former Rep. Teddy Baguilat bilang Secretary General, at Rep. Alfonso “Boy” Umali bilang Treasurer, habang nanatili bilang Director General si Iloilo Provincial Board Member Jason Gonzalez.
Pinalitan ni Lagman si dating Sen. Kiko Pangilinan na siya naman ngayong party chairman.
Kung babalikan, pinalitan rin ni Pangilinan si dating bise presidente Leni Robredo sa naturang posisyon.
