Hiniling ng ilang mambabatas kay Pangulong Rodrigo Duterte na i-certify bilang priority bill ang panukala para sa pre-audit system na nakabinbin ngayon sa House of Representatives.
Sa isang pahayag ay sinabi ni San Jose Del Monte City Representative Florida Robes na posible na ang pre-audit system bill na ang maging sagot para maiwasan ang mga kontrobersya na may kinalaman sa findings ng Commission on Audit (COA) sa iba’t-ibang ahensya ng gobyerno.
Ayon kay Robes, layon ng panukala na i-institutionalize ang pre-audit system sa disbursement ng public funds upang mabawasan o maiwasan ang mga nakukuwestyon na paraan ng paggamit sa public funds.
Naniniwala ang mambabatas na maisusulong ang transparency at accountability sa disbursement ng public funds kung maipapasa ang batas.
Titiyakin rin anya nito na sapat ang kapasidad ng mga ahensya ng gobyerno at ng local government agencies na i-implementa ang mga programa nito sa nakatakdang oras.
