GISULOD sa kawatan ang duha ka kwarto sa usaka boarding house sa Purok 5, Barangay Labangal, Agosto 7 sa kaadlawon apan nagpasalamat ang tagbalay nga wala sila unsaa sa kawatan samtang natulog.
Ang usa ka biktima nahinabi sa Brigada patrollers bag-o pa kini nakapatala sa Makar PNP kalabot sa nahitabo, sumala kay Opaw Pandapatan, 27- anyos nga hinanok gayod ang ilang katulogon gumikan gikapoy sa ilang negosyo sa Oval Flea market naninda og pagkaun mao nga pasado ala una na nakauli sa ilang boarding house.
Sa iyang bana-bana naa sa mga alas kwatro nisulod ang kawatan gamit ang sundang sa pagkuhit sa ilang trangka sa kwarto kay abli man sa gawas, gikuha ang bag sa iyang asawa nga adunay sulod duha ka cellphone nga tag P9,000 ang bili unya apil sa gikuha ang P2,500 pesos nga cash.
Nakuratan nalang kini sa dihang nakamata nga naabli na ang ilang pultahan ug nabalhin na ang ilang sundang, nakita daw nila pagbalik ang bag gawas sa ilang simbahan unya nawala na duha ka cellphone ug salapi samtang naa pa ang mga ID. Nagpasalamat nalang si Pandapatan nga wala sila unsaa sa kawatan, samtang nakawatan usab og cellphone ang katapad nila nga kwarto,dili usab siya sigurado kon si kinsa ang nangawat.
