Nagapadayon ang palit sa merkado publiko sa karneng baboy apan adunay epekto sa ihap sa mamalitay sumala sa meat vendors.
Adlaw nga Dominggo sa dihang gikomusta sa Brigada patrollers ang Meat Section ilabi na sa namaligya ug karneng baboy gumikan sa mga kaso sa African Swine Fever (ASF) sa Gensan sa milabay nga semana partikular sa Barangay Baluan.
Naabtan sa Brigada Patrollers ang usa ka mamalitay nga nagpaila nga si Armando Coja nga taga DBP Homes, Gensan, sumala niini nga pasalamat siya kay medyo niubos ang presyo sa karne ug isda kay aduna siyay ginabantayan nga pasyente sa ilang balay.
Wala daw siya nabalaka sa ASF kay nisalig siya sa iyang suki nga pwesto unya gina-anunsyo man sa taga goberno nga dili kini maka-apekto sa lawas sa tawo.
Sumala usab sa tindera nga nagpailang si Jojo nagapadayon ang palit apan anaa daw sa 10 ka porsyento ang pag-ubos sa ilang halin gikan sa karneng baboy ug nagduda sila nga gumikan kini sa kaso sa ASF.
Basi sa Price Bulletin sa Gensan Meat Vendors Multipurpose Cooperative ang presyo sa karneng baboy sa tiyan P330 pesos matag kilo, unod P310 pesos, abaga P310, pork chop P310, pata P280,gusok P280, maskara P280, soup bones P220 ug laman loob P130 matag kilo. Kahibaluan nga una na nga gipaniguro sa pangulo sa Meat Vendors nga si Toto Mosqueda nga hinlo, niagi sa proseso ang ilang tinda nga karne gumikan naggikan kini sa mga piggery ug dili sa likod balay nga babuyan. I Ver Diazon
