MISAKA na og 5.97% ang ihap sa babayeng nahimong inahan sa edad nga 10 hangtud 19-anyos atong 2019, tandi sa datus atong 2018. Kini base sa datus sa Commission on Population and Development sa Soccsksargen nga gihatag gahapon.
Matud ni Alvin Dwight Asentista, Information Officer III sa POPCOM-12, base sa datus nga gihatag sa Philippine Statistics Authority (PSA). Makita nga gikan sa 10,499 menor de edad nga nahimong inahan atong 2018 misaka na kini sa 11,126 atong 2019. Sa datus sa tibuok Pilipinas, nabutang sa ikatulong pwesto ang rehiyon-12 sa labing daghang kaso sa teenage pregnancy.
Apan naa sa unang pwesto ang Davao region ug Northern Mindanao. Samtang upat ka 12-anyos nga batang babaye ang labing mga bata nga nahimong inahan sa rehiyon. Ang pagsaka sa ihap ang apekto sa ‘improper parenting’, kulang nga resources sa self-development ug edukasyon. Gikaengong delikado alang sa mga menor de edad ang magsabak tungod sa posibleng komplikasyon ug nutritional problema.
Tungod niini, gipakusgan nila kauban ang Department of Education (DepEd) ug Department of Health (DOH). Ang mga lakang sama sa social and health services aron makonhuran ang kaso sa early adolescent pregnancy. (Richel Gubalani)
