MISAKA na sa walo katao ang namatay sa dengue sa GenSan taas tandi sa lima ka deaths nakalabay’ng tuig sa samang panahon.
Base sa datus sa City Health Office (CHO) Epidemiology and Surveillance Unit (CESU) gawas sa pagsaka sa ihap sa namatay mitaas usab sa 116 % o 962 cases ang natala gikan Enero hangtud ning bulana tandi sa 445 cases nakalabay’ng tuig.
Sa maong mga kaso naa sa 95% o 913 ang na-ospital samtang walay nakumpirma sa laboratoryo. Sa 26 ka barangay sa GenSan, Fatima ang nakatala og labing daghang kaso nga dunay 151 o 16% sa kinatibuk-ang dengue cases. Gisunduna kini sa Barangay San Isidro nga dunay 146; Calumpang 142; Labangal 118; Lagao 73; City Heights 48; Apopong 47.
Samtang nakatala og 44 ka kaso ang Barangay Tambler, 40 ang Bula ug 26 ang Mabuhay. Naa usab sa edad 0.08 hangtud 76-anyos ang natakboyan sa sakit ug naa sa 55% niini ang lalaki.
Sa impormasyon sa CESU, ang misaka ang narekord nila nga kaso tungod makahatag na kanila og taho karon ang mga Rural Health Unit (RHU) sa mga barangay tandi kaniadto nga sa ospital lang makuha ang datus. (Richel Gubalani)
