Giawhag karon sa Davao City Health Office (CHO) ang mga Dabawenyos nga kanunay mag-igmat ug siguruhong limpyo ang palibot, nunot sa natalang lima ka indibdiwal nga namatay tungod sa dengue.
Sumala kang CHO Tropical Diseases Prevention and Control Unit Coordinator and Nutrition Division Head Beth Banzon, RN, kinahanglan ipahiling dayon sa mga doktor kung dunay masinati nga usa sa mga sintomas sa dengue sama sa kalintura ang magdugay sa tulo hangtud pila ka adlaw sangit traydor ang maong sakit.
Gawas niini dili usab angay kakumpiyansahan ang kalintura sanglit usa usab kini sa mga sintomas sa COVID-19, apan kung ang kalintura maabtan na og sobra unom ka adlaw, kritikal na matud pa kini nga pwedeng mogawas ang ubang sintomas sama sa nosebleeding, stomach ache, rashes, dehydration, ug pagsuka nga dunay sagol dugo.
Subay matud pa sa datus, gikan 102 sa miaging bulan sa Mayo misaka pa sa 133 sa bulan sa Hunyo karong tuiga nga resulta matud pa sa daghang namonitor nga breeding sites sa mga lugar nga ilang nabisita.
Base sa dengue monitoring, ang Talomo Poblacion ang nanguna sa listahan human nakatala og 22; gisundan sa Sasa nga dunay 15; Panacan (12); Maa (11); Tibungco (10), Calinan Poblacion (walo); Bunawan, Matina Crossing, ug Mintal adunay tag-unom; Catalunan Grande (lima); Daliao, Tigatto, ug Cabantian adunay tag-upat ka kaso ug Wilfredo Aquino (tulo).
Karong panahona hangtud bulan sa Setyembre gilauman sa buhatan nga madugangan pa ang matalang kaso gumikan sa mga pag-ulan nga matagamtaman busa gihangyo ang tag-balay nga kanunay limpyuhan ang palibot. BNFM-DAVAO
