Ginbasura sang korte ang kaso nga Falsification batok kay Gigi Obera, anay barangay kagawad sa Brgy. Tiza, Roxas City nga ginpasaka ni anay Kapitan kag sa karon Brgy. Kagawad Minong Albaladejo.
Sa interview sang Brigada News FM Roxas kay Gigi Obera, iya ginpahayag nga nag-ugat ang nasambit nga kaso matapos ini naghatag sang certificate of indigency sa isa ka tanod sa ila barangay sadtong Oktubre 2023 samtang wala si Albaladejo sa Barangay Hall.
Suno diri, ginkaakig sang anay kapitan ang natabo rason nga nagpasaka ini sang kaso nga falsification of public document kag usurpation of power batok sa iya.
Dugang pa sini, sa nasambit nga tion, kasagkasagan gid sang Barangay and Sangguniang Kabataan Election period, nagapapili siya bilang kapitan sa barangay nga ginaka-ugot ni Albaladejo.
Nagapati siya nga pamulitika ang natabo bangud kun hungdon indi man big deal ang pag-isyu sang indigency kay para sa iya allowed man sila nga maghatag sini sa pumuluyo nga nagakinahanglan kun wala ang presensya sang kapitan.
Sa karon, nagapasalamat si Obera bangud na-dismiss na ang iya isa ka kaso nga ginapangatubang. | Judy Ann Juare
