GIKUMPIRMA ni Police major Ananias Vasquez, hepe sa Tambler PNP nga sa Lunes, Agosto 16 ipasaka ang kasong murder batok sa pulis nga mipusil patay sa iyang distant relative.
Segun ni Vasquez, nga gina-dokumento pa ang mga ebidensya human misurender si Patrolman Jade Rio Mantua, 31-anyos, ulitawo, nakadestino ilawom sa Regional Mobile Force Battalion kun RMFB-12.
Gipailalom usab sa ballistic test ang armas ng gigamit sa maong pulis ug gipa-paraffin test na kini.
Dugang pa ni Vasquez nga wala pa mihatag og pamahayag ang maong pulis apan may mga testigo nga mutudlo sa nahisgutan nga mipusil patay sa biktima nga si Rusty Dumas, 35-anyos, usa ka mananagat, residente sa Diamond Valley, Barangay Tambler ning dakbayan.
Una nang gibutyag ni PLt. Clarizel Perez, tigpamaba sa General Santos City Police Office nga gihikutar na karon ang mga dokumento aron pormal nang mapasaka sa piskalya ang tukmang kaso sa batok kang Patrolman Mantua nga karon nabalhog na sa selda sa Tambler police station.
