MI-ALMA si Kagawad Atty. Franklin Gacal Jr. sa wala pagpaapil kaniya sa special session sa Sangguniang Panlungsod asa gituki ang supplemental budget sa syudad.
Alang kang Gacal nga naka-leave siya apan iyaha kining gibawi aron makaapil sa session pinaagi sa virtual conference tungod gusto nga mapadangat ang iyang pagkontra sa maong supplemental budget.
Natingala usab si Gacal unsa ang gikahadlokan sa konseho nganong dili kini paapilon luyo nga wala man sa virtual conference ordinance nga bawal mo-attend sa session kung anaa sa gawas sa nasud.
Gikumpirma usab ni Kagawad Atty.Jose Edmar Yumang, wala usab natuki ang maong supplemental budget tungod wala na-transmit sa SP ang committee report sa Committee on Finance ug tukion sa Martes.
Dugang ni Yumang nga wala maapil ang attendance ni Gacal sa special session tungod naka-personal leave kini ug bisan iyaha pang gibawi, dili usab makasalmot tungod wala kini sa Pilipinas.
Naaprobahan usab sa konseho nga dili mahimong makaapil sa special session si Gacal tungod naka-leave kini ug atua sa Amerika nga bisan virtual, dili makaapil tungod sa legal nga mga basehan.
Una nang gipamugos ni Gacal nga gihikawan siya sa iyang katungod sa wala pagpaapil sa special session luyo nga gibawi ang iyang leave ug may naaprobahan nga virtual conference ordinance ang SP.
Apan tubag usab ni Yumang, wala nila gi-deprived si Gacal sa iyang katungod apan ang pag-adto niini sa Amerika ug nag-personal leave, ang nagpasabot nga absent kini ug dili mahimong apilon sa quorum.
