DILI na kinahanglan nga magmahayay pa ang kapulisan sa GenSan ug Bureau of Jail Management and Penology kun BJMP sa pagpositibo sa 55 ka inmate sulod sa GenSan City Jail nakalabay’ng semana.
Matud ni Major Rissa Hernaez, tigpamaba sa General Santos City Police Office kun GSCPO wala sa patakaran sa BJMP nga kinahanglang ipailawom sa rapid test o RT-PCR test ang inmate bag-o kini i-commit.
Ang bugtong rekisitos lang nga nasayran nila mao ang pagkuha og medical certificate sa mga piniriso bag-o nila ibiyahe sa City Jail. Gihingusgan ni Hernaez nga andam sila makigpulong sa pangulohan sa BJMP sa dakbayan aron plansahon ang maong mga proseso.
Una nang, gibutyag ni Jail Supt. Metz Milton Placencia, city jail warden nga dunay ‘lapses’ ang kapulisan partikular na sa San Isidro Police Station human wala gisulti kanila nga closed contact ang female inmate sa usa pa ka babayeng piniriso sulod sa presinto bag- o pa kini gibiyahe.
Wala na lang unta nila gidawat ang female inmate kung nasayran nila kini tungod niini nagpositibo ang ubang bag-ong sulod nga inmate sa presohan. (Richel Gubalani)
