BLANGKO pa karon ang kapulisan sa motibo sa labing ulahing insidente sa pagpamusil-patay sa GenSan, Biyernes sa buntag.
Matud ni PCapt. Miguel Quidilla, OIC Chief of Police sa Lagao Police Station gimanduan na niya ang sakop sa pagpalawom sa imbestigasyon.
Nagpadala na sila og sulat hangyo sa mga tag-iya sa mga establisimento dapit sa lugar nga gihitaboan aron makakuha og kopya sa CCTV.
Nakig-alayon na usab sa pamilya ug mga kauban sa trabaho sa gipatay nga si Romelito Fronteras, 33-anyos, dunay tulo kaanak ug taga Block 1, Yanzon Village sa maong barangay.
Nanghinaot si Quidilla nga makakuha sila og igong impormasyon aron matumbok nila ang motibo sa pagpatay.
Biyernes sa buntag samtang sakay motorsiklo padulong gasoline station gipusil si Fronteras sa wala mailang tawo sakay sa motorsiklo.
Nakaangkon kini og samad pinusilan sa nagkadaiyang bahin sa lawas samtang narekober ang tulo ka basiyo sa .45 kalibre sa pusil. I Richel Gubalani
