GIBUTYAG ni Assistant Provincial Administrator Engr. Gerald Faciol nga target sa pamunuan ni Governor Steve Chiongbian Solon nga mahimong sentro sa turismo ang Kapitolyo sa Sarangani.
Gani, daghan matud pa ang gabisita sa Sarangani Capitol, gapahulagway sa mga talan-awon sulod sa Capitol Compound una mudiritso sa mga tourism destination nga anaa sa mga munisipyo.
Rason nga gi-prayoridad og sakto ang limitadong pondo sa Sarangani Provincial Government alang sa nagpadayon nga pandemya ug sa nagkadaiyang programa ug proyekto nga gipondohan sa probinsya sa mga kabarangayan, aron mapadayon usab ang face-lifting ug pagpanindot sa Kapitolyo.
Nindot na ang Sarangani Capitol Lobby susama sa hotel. Daw susama sa mall na usab ang mga CR o comfort room sa main building.
Unang basihan sa maayong pagdumala bisan sa panimalay kanang adunay maayong paghan-ay sa CR kon kasilyas ang tigtungod, mapakita ang pagka-maabi-abihon sa mubisita, ug kana ang gisiguro pud sa pagdumala ni Governor Solon sa Kapitolyo.
Unang gibutyag sa chairman sa SP Committee on Tourism, Board Member Dr. Ruiz, nga kinahanglang ma-preserba ang kanindot sa Sarangani Capitol gikan sa pagkatukod niini tuig 1992 gihulma ang istruktura sa neo-classical design ug may bansagon na gani matud pa kini nga “White House of Southern Mindanao.”
