Naugdaw ang gibanabana nga moabot sa 36 ka panimalay sa sunog nga niulbo alas 9:25 sa buntag kagahapon Hulyo 14, 2024, sa Sitio Sudlon, Barangay Catarman, Cordova, Cebu.
Matud ni Fire Office 1 McDowell Maglangit, giisa nila sa 1st alarm ang sunog alas 9:30 sa buntag, alas 9:45 giisa sa 2nd alarm, pagka alas 9:52 gisaka pa sa 3rd alarm.
Nakontrolar ang sunog alas 9:57 sa buntag ug hingpit nga napawong alas 10:15 sa buntag.
Sa 36 ka mga balay, 22 niini naugdaw ug partially burned ang 14 uban sa gamay nga danyos diin nakaapekto sab kini sa 36 ka pamilya ug 185 ka mga indibidwal.
Gibanabana nga moabot sa P250,000 ang danyos ug padayon pa nga giimbestigahan ang hinungdan sa sunog.
Wala hinuon kinabuhi nga nakalas sa maong sunog apan adunay usa nga naangol ug wala na usab angayan nga kabalak-an sa kahimtang niini.
