Dead on Arrival sa tambalanan ang 52-anyos nga kanhi kapitan sa lungsod sa Tuburan human nabangga ang gisakyan niini nga ford ranger pick-up ngadto sa howo dump truck didto sa national highway Sitio Kampatok, Brgy. Dalid, lungsod sa Tabuelan, pasado alas 10 sa buntag kagahapong adlawa, Hulyo 26, 2024.
Ang nakalas mao si Vicente Pontillas, 52-anyos, kanhi kapitan sa lungsod sa Tuburan ug residente sa Purok Suba Brgy 2, Tuburan.
Samtang ang naangol nga driver sa pick-up mao si Michael Pontillas, 25-anyos ug anak sa nakalas.
Sa imbestigasyon, paingon sa lungsod sa Sugod ang pick-up, samtang ang dumptruck nga gidrayban sa 27-anyos nga si Richard Matugas paingon sa Brgy. Poblacion Tabuelan, sa dihang pagkaabot sa lugar sa nahitaboan, aksidente nga nagkabangga ang dumptruck ug pick-up.
Gidala pa sa tambalanan ang driver sa pick-up ug ang sakay niini apan dead on arrival na ang sakay gumikan sa impact sa pagkabangga.
Samtang gikustodiya na sa kapulisan sa Tabuelan Police Station ang driver sa dumptruck ug posibleng mag-atubang og kaso nga reckless imprudence resulting to homicide, physical injury, ug damage to property.
