LEGAZPI CITY – Nagpepreparar na an Legazpi City Tourism Office para sa nararaning Ibalong Festival sa masunod na bulan. Sa intrevista kan Brigada News FM Legazpi kay City Tourism Officer Cristina Agapita Pacres, sinabi nito na sa Agosto 9-18 an nakatalaang petsa kan selebrasyon kaini, kun sain pinag-oorolayan na an nagkapira sa mga gigibuhong aktibidad katakod kaini.
Segun kay Pacres, dapat abangan kan mga Legazpeño an grand opening ceremony sa Agosto 9, pati naman an Mutya ng Ibalong, Search for Lakan ng Ibalong, grand parade, konsiyerto, street dance competition asin dakol pang iba. Apwera kaini mabugtak man ki plaza asin baratilyo na madurar hasta Agosto 31.
Ini na su boot an pagbabalik kan Ibalong Festival matapos makanselar nin huli sa COVID-19 pandemya, asin sa pag-alburoto kan Bulkang Mayon kan nakalihis na taon kun sain uminabot sa alert level 3 an status kan bulkan. Laom ni Pacres, magigin dakula asin magayon ining selebrasyon ngunyan na taon kaya pangapodan niya sa mga Legazpeño na makisumaro sa pinag-andaman nindang aktibidad.
