Pasado na sa ikatlo at huling pagbasa sa Kamara kahapon ang House Bill No. 7352 o panukalang Constitutional Convention Act, na siyang ‘accompanying bill’ ng Resolution of Both Houses No. 6 na nagpapatawag ng con-con para sa pag-amyenda ng 1987 Constitution.
Ang panukalang batas, na siyang implementing measure ng RBH No. 6, ay nakakuha ng 301 “Yes” votes at pitong “No” votes. Walang nag-abstain sa panahon ng botohan.
Nakapaloob sa panukala ang pagbibigay ng P10,000 kada araw ng attendance compensation sa mga delegado sa panahon ng con-con proceedings.
Nakasaad din sa con-con bill na ang con-con delegation ay bubuuin ng humigit-kumulang 316 members kung saan 80% sa kanila ay ihahalal mula sa mga Congressional districts habang 20% ay hihirangin ng Pangulo.
Ang term of office ng con-con delegates ay tatakbo mula December 1 ngayong taon hanggang June 30, 2024.//CA
